بی بی سی: فرمانده سنتکام می‌گوید ممکن است آمریکا به تاجیکستان اجازه دهد هواپیماهای نظامی افغانستان را که نظامیان پیشین، بعد از تسلط طالبان به تاجیکستان منتقل کردند، نگهداری کند.
خلبانان افغان آموزش‌دیده آمریکا در ماه آگوست/اوت سال گذشته میلادی ده‌ها هواپیما و هلیکوپتر نظامی را هنگام فرار از طالبان به تاجیکستان و ازبکستان رساندند.
طالبان خواستار بازگرداندن این هواپیماها شده‌اند.
به گزارش رویترز ژنرال مایکل اریک کوریلا، رئیس ستاد فرماندهی مرکزی ایالات متحده (سنتکام) که هفته گذشته در سفر به تاجیکستان با امامعلی رحمان، رئیس‌جمهور و شماری از مقام‌های ارشد آن کشور دیدار کرد، گفته است: ««ما از نیروهای مسلح جمهوری تاجیکستان به خاطر ادامه حفاظت از هواپیماهایی که نیروی هوایی افغانستان در ماه آگوست گذشته به این کشور منتقل کردند، سپاسگزاریم.»
او افزوده که این هواپیماها قطعا به افغانستان بازگردانده نخواهد شد، زیرا متعلق به طالبان نیست.
سنتکام هفته گذشته در خبرنامه‌ای گفت که آمریکا در امور آموزش، تجهیزات و زیرساخت‌ها به تاجیکستان، برای دفاع از مرز خود با افغانستان کمک می‌کند.
این ژنرال آمریکایی به مقامات تاجیک گفته است که نیروهای ویژه آمریکایی تجربیات مبارزه با گروه‌های تروریستی را می‌توانند «در اختیار نیروهای مسلح جمهوری تاجیکستان قرار دهند.»
